🔎 ONTDEK-REEKS
🔎 VOOR-LES 1
DIE GEHEIME AGTER DIE BYBEL!
Is dit die Woord van God?
Welkom by jou heel eerste groot avontuur in die Ontdek-reeks! Vandag begin ons met ’n baie spesiale ontdekkingsreis!
Ons gaan ontdek hoe God Sy Woord aan ons gegee het!
Is julle gereed vir ons reis?
🕵️ DIE ONTDEKKER-VERHAAL
MARY JONES EN DIE BOEK WAT SY SO GRAAG WOU HÊ 📖❤️
Stel jou voor jy is ’n jong meisie en jy het ’n boek wat jy baie graag wil hê. Maar daar is een probleem: Jy het nie genoeg geld om dit te koop nie. Dit was die werklikheid vir ’n jong Walliese meisie met die naam Mary Jones. Mary het in die berge van Wallis gewoon. Sy was baie lief daarvoor om van God te leer, maar daar was nie ’n Bybel in haar huis wat sy self kon lees nie. Sy het gehoor van ’n man in die dorp Bala wat Bybels verkoop. Maar Bala was ver weg. Ongeveer 40 kilometer! Mary het besluit dat sy haar eie Bybel wou hê. So het sy begin spaar. Sy het nie net ’n paar weke gespaar nie. Sy het ses jaar lank gespaar.
Uiteindelik, in die jaar 1800, toe Mary 15 jaar oud was, het sy die geld gehad wat sy nodig gehad het. Sy het kos vir die reis saamgeneem en die lang pad deur die Walliese berge aangepak. Stap vir stap. Heuwel na heuwel. Sy het ongeveer 40 kilometer geloop om by Bala uit te kom. Toe sy uiteindelik by die huis van dominee Thomas Charles aankom, het sy hom vertel waarom sy gekom het. Sy het haar geld saamgebring. Sy wou net een ding hê: Haar eie Bybel. Thomas Charles was diep geraak deur hierdie jong meisie se vasberadenheid. Hy het vir haar ’n Bybel gegee. Mary het uiteindelik dit waarvoor sy ses jaar lank gespaar en ongeveer 40 kilometer geloop het, in haar hande gehad.
Sy het die Bybel gekoester en huis toe geneem. Maar Mary se verhaal het nie daar geëindig nie. Thomas Charles het begin besef dat daar baie ander mense was wat, net soos Mary, graag ’n Bybel wou hê. Mary se verhaal en die groot behoefte aan Bybels het gehelp om by te dra tot die stigting van die British and Foreign Bible Society in 1804, wat daarna gewerk het om Bybels aan mense beskikbaar te stel. (Bible Society)
💡DINK HIEROOR:
Stel jou voor… Jy moes ses jaar lank spaar voordat jy ’n Bybel kon kry.
En toe moes jy ongeveer 40 kilometer stap om dit te gaan haal.
❓ Sou jy dit gedoen het?
Waarom dink jy was Mary bereid om so ver te gaan vir ’n Bybel?
🔎 DIE GROOT VRAAG
Mary het geweet die Bybel is kosbaar — maar waar het hierdie Boek eintlik vandaan gekom? Wie het dit geskryf? Hoe het God Sy Woord aan mense gegee? Hoe weet ons dat ons dit kan vertrou? En waarom het God dit vir ons gegee?
❓ Het God self die Bybel met ’n pen geskryf?
Nee.
God het nie self ’n pen opgetel en elke bladsy geskryf nie.
Hy het mense gebruik om Sy Woord neer te skryf.
Die Bybel sê:
“Die hele Skrif is deur God ingegee…”
— 2 Timótheüs 3:16
Dit word inspirasie genoem.
Dit beteken dat God deur die Heilige Gees met die Bybelskrywers gewerk het sodat hulle die boodskap kon neerskryf wat Hy aan hulle wou gee. Hulle was nie robotte wat net woorde moes kopieer nie. Hulle het hulle eie persoonlikhede, woordeskat en skryfstyl gehad.
Maar God het hulle gelei.
🔎 ONTDEKKING
God het Sy Woord deur mense aan ons gegee.
✍️ MAAR WIE HET DIE BYBEL GESKRYF?
Hier word dit interessant!
Die Bybel is nie deur net een persoon geskryf nie.
Dit is ’n versameling van baie boeke wat oor ’n baie lang tydperk geskryf is.
Tradisioneel word daar gepraat van meer as 40 menslike skrywers, oor ongeveer 1 500–1 600 jaar.
En kyk net hoe verskillend was sommige van hulle!
👑 Konings — soos Dawid en Salomo
🎣 Vissers — soos Petrus en Johannes
👨⚕️ ’n Geneesheer — Lukas
🐑 ’n Skaapwagter — Amos
📜 ’n Leier en wetgewer — Moses
📖 ’n Priester en profeet — Esegiël
👤 ’n Belastinggaarder — Matteus
Hulle het in verskillende tye geleef en verskillende agtergronde gehad.
Tog vorm hulle geskrifte saam een groot verhaal van God se liefde en Sy plan om die mens te red.
💎 WONDERLIKE ONTDEKKING
Baie mense het geskryf.
Maar daar is Een God wat hulle geïnspireer het.
🧠 MAAR HOE HET HULLE GEWEET WAT OM TE SKRYF?
💡“Het God dan vir hulle alles hardop gesê?”
Nie altyd nie.
God het op verskillende maniere met Sy profete en boodskappers gewerk.
Die Bybel sê:
“… geen profesie is ooit deur die wil van ‘n mens voortgebring nie, maar deur die Heilige Gees gedrywe, het die heilige mense van God gespreek.” — 2 Petrus 1:21
Soms het God deur visioene of drome geopenbaar wat hulle moes weet.
“Ek het ook tot die profete gespreek en Ek het gesigte vermenigvuldig en deur middel van die profete gelykenisse voorgedra..” — Hoséa 12:11
Soms het hulle gebeure self gesien en dit neergeskryf.
Soms het hulle bestaande rekords of getuienisse ondersoek.
Lukas begin byvoorbeeld sy Evangelie deur te verduidelik dat hy die dinge wat gebeur het noukeurig ondersoek het.
“.. nadat ek van voor af alles noukeurig ondersoek het, om dit in volgorde aan u te skrywe..” — Lukas 1:1–4
God het dus nie elke skrywer op presies dieselfde manier gebruik nie.
Maar die Heilige Gees het hulle gelei.
🪶 WAAROP HET HULLE GESKRYF?
Daar was nie papierboeke of rekenaars soos vandag nie.
Mense het onder andere geskryf op:
📜 perkament — voorbereide dierevelle
🌿 papirus — ’n skryfmateriaal wat van ’n plant gemaak is
🪨 klip — soos die kliptafels waarop die Tien Gebooie geskryf is
🏺 kleitablette — wat in die antieke wêreld gebruik is
En natuurlik moes baie van hierdie geskrifte later met die hand gekopieer word.
Geen fotostaatmasjien nie.
Geen “copy & paste” nie!
📚 IS DIE BYBEL EEN BOEK?
Ja… en nee! 😄
Die Bybel is een geheel, maar dit bestaan uit 66 boeke.
Dink aan ’n biblioteek.
In ’n biblioteek is daar baie verskillende boeke — geskiedenisboeke, gedigte, briewe, biografieë en ander geskrifte.
Die Bybel is ook ’n versameling van verskillende soorte boeke.
📖 DIE OU TESTAMENT
39 boeke
Dit vertel van die skepping, die mens se val, God se verbond met Sy volk, Israel se geskiedenis, die profesieë en die beloftes van die komende Verlosser.
📖 DIE NUWE TESTAMENT
27 boeke
Dit vertel van Jesus se lewe, dood en opstanding, die begin en groei van die Christelike kerk, en die hoop op Sy wederkoms.
🌟 DIE GROOT VERBAND
Die Ou Testament wys vorentoe na die komende Verlosser.
Die Nuwe Testament vertel hoe Jesus gekom het en die profesieë in die Ou Testament vervul het en wys ook vorentoe na Sy wederkoms en die herstel van alles.
En deur die hele Bybel loop daardie goue draad:
❤️ JESUS
🔎⭐️INTERESSANTE ONTDEKKING!
Die Bybel is nie oorspronklik in Afrikaans geskryf nie. Die Ou Testament is hoofsaaklik in Hebreeus geskryf, met gedeeltes in Aramees. Die Nuwe Testament is hoofsaaklik in Grieks geskryf. Later is die Bybel in baie ander tale vertaal — waaronder Afrikaans.
Hierdie handgeskrewe dokumente word manuskripte genoem!
🔎 HOE WEET ONS DAT DIE BYBEL BETROUBAAR IS?
’n Baie belangrike rede is die groot hoeveelheid antieke manuskripte en manuskripgetuienis wat ons het. Die Bybel is eeue lank deur skrifgeleerdes met die hand gekopieer. Hulle het baie moeite gedoen om die teks akkuraat oor te dra. En dan kom daar ’n baie interessante ontdekking:
🔎 🏺 DIE DOOIE SEE-ROLLE!
In 1947 het ‘n jong skaapwagter antieke manuskripte naby die Dooie See ontdek. Hierdie rolle was omtrent 2000 jaar lank in kleipotte weggesteek en het gewys dat die Bybel oor al die eeue heen ongelooflik akkuraat oorgeskryf is. Onder hulle was baie Bybelse tekste en fragmente van die Ou Testament. Toe geleerdes hulle met later manuskripte vergelyk het, het hulle gevind dat die Bybelse teks oor die eeue heen baie noukeurig oorgedra is, met die soort variasies wat ons van handgeskrewe manuskripte verwag.
💎 WAT LEER DIT ONS?
Die Bybel is ‘n baie ou Boek, maar dit het nie sommer met die jare in ’n heel ander boek verander nie.
Ons het baie ou manuskripte wat met die Bybel van vandag vergelyk kan word. Dit wys vir ons hoe noukeurig die Bybel deur die eeue oorgedra is.
🌟 God het Sy Woord bewaar sodat ons dit vandag nog kan lees en vertrou. 📖❤️
❤️ WAAROM HET GOD VIR ONS DIE BYBEL GEGEE?
God het nie die Bybel gegee om net op ’n rak te staan nie. Hy het dit gegee sodat ons Hom kan leer ken, Sy liefde kan verstaan en Sy plan vir ons te ontdek.
DIE BYBEL LEER ONS:
Wie God is en hoe lief Hy ons het.
Waar sonde begin het en waarom ons ’n Verlosser nodig het.
Wat Jesus vir ons gedoen het om ons te red.
Wat waarheid is en hoe om God se wil te verstaan.
Hoe om versoeking te weerstaan en goeie keuses te maak.
Hoe om te leef soos Jesus geleef het.
Watter hoop ons het — Jesus kom weer om alles nuut te maak!
Die grootste ontdekking
Die Bybel is soos ’n padkaart wat ons na Jesus lei. Jesus het self gesê:
“Julle ondersoek die Skrifte … dit is dié wat van My getuig.”
— Johannes 5:39
Wanneer ons die Bybel oopmaak, ontdek ons meer as net woorde en verhale — ons ontdek Jesus en Sy groot liefde vir ons. ❤️📖
👧🧒 IS DIE BYBEL OOK VIR KINDERS?
Beslis!
Paulus sê in die Bybel vir Timotheus:
“en dat jy van kleins af die heilige Skrifte ken wat jou wys kan maak tot saligheid …” — 2 Timotheus 3:15
Timoteus het dus nie gewag totdat hy ’n grootmens was voordat hy God se Woord begin leer het nie.
Hy het as kind begin.
Dit beteken:
📖 JY IS NOOIT TE JONK OM GOD SE WOORD TE ONTDEK NIE!
🕵️ JOU EERSTE GROOT BYBEL-ONTDEKKERS-TOETS
Kom ons kyk wat jy ontdek het!
1. Hoeveel boeke is in die Bybel?
☐ 27
☐ 39
☐ 66
2. Hoeveel boeke is in die Ou Testament?
☐ 27
☐ 39
☐ 66
3. Hoeveel boeke is in die Nuwe Testament?
☐ 27
☐ 39
☐ 66
4. Wie het die Bybelskrywers geïnspireer?
☐ Die koning
☐ Hulle onderwysers
☐ Die Heilige Gees
5. Watter Bybelskrywer was ’n geneesheer?
☐ Petrus
☐ Lukas
☐ Moses
6. In watter taal is die Nuwe Testament hoofsaaklik geskryf?
☐ Hebreeus
☐ Afrikaans
☐ Grieks
7. Wat is een belangrike rede waarom God vir ons die Bybel gegee het?
☐ Om net geskiedenis te leer
☐ Om ons besig te hou
☐ Om Hom te leer ken en Sy plan vir ons te ontdek
🔎 JOU EIE BYBEL-ONTDEKKING
Nou is dit jou beurt!
Vat jou eie Bybel.
📖 Ontdek nommer 1
Soek die eerste bladsy van Genesis.
Hoe begin die Bybel?
📖 Ontdek nommer 2
Soek die eerste hoofstuk van Matthéüs.
Hoe begin die Nuwe Testament se verhaal?
📖 Ontdek nommer 3
Soek Johannes 5:39.
Wat sê Jesus oor die Skrifte?
📖 Ontdek nommer 4.
Soek 2 Timótheüs 3:15–17.
Wat kan die Skrifte volgens hierdie gedeelte vir jou doen?
🔎♥️💎 DIE GROOTSTE ONTDEKKING
Jy het vandag ontdek dat die Bybel:
uit baie boeke bestaan,
deur baie menslike skrywers geskryf is,
deur die Heilige Gees geïnspireer is, in antieke tale geskryf is,
deur die eeue noukeurig oorgedra is, ondersoek kan word,
kinders dit van kleins af kan leer ken
en — die belangrikste van alles — na Jesus wys
📖 God het vir ons Sy Woord gegee .. hoe moet ons dit lees?
Moet ons dit net soos enige ander boek lees?
Of moet ons dit ondersoek, vergelyk, daaroor bid en Jesus daarin ontdek?
🔎 DIT IS WAAR ONS VOLGENDE ONTDEKKING BEGIN.
Kom ons gaan na: